Акмал Муродов, паҳлавони тоҷик, субҳи имрӯз, 27-уми июл, дар Олимпиадаи Токио дар даври муқаддамотии сабқати ҷудо дар вазни то 81 кило бар Ҷоштер Эндрю аз Гуам пирӯз шуд. Ҳамакнун Акмал дар даври баъдӣ бо Тато Григалашвили аз Гурҷистон рақобат хоҳад кард.

Дар радабандии ҷаҳонӣ Акмал Муродови 25-сола дар зинаи 53-юм ва Тато Григалашвили дар зинаи 3-юм қарор доранд. Теъдоди варзишгарон дар ин вазн 35 нафарро ташкил медиҳад. Тато Григалашвилии 21-солаи номдору пуртаҷриба барандаи медали нуқраи қаҳрамонии ҷаҳон дар соли 2021 дар Маҷористон мебошад. Вай имсол, инчунин дар мусобиқаи устодони ҷудо дар Доҳаи Қатар (Doha Masters 2021) ғолиб шуда, дар Tbilisi Grand Slam 2021 медали биринҷӣ гирифтааст.

Ёдовар мешавем, аз байни паҳлавонони тоҷик аввалин шуда Сомон Маҳмадбеков 26-уми июл дар Олимпиадаи Токио вориди рақобат шуд. Вай дар ду даври муқаддамотии сабқати ҷудо дар вазни то 73 кило бар Аҳмад Аликай аз тими паноҳандагон ва Файе Нҷие аз Гамбия пирӯз шуд, вале дар даври севум аз Рустам Оруҷеви озарбойҷонӣ шикаст хӯрд ва аз ҳаққи идомаи мубориза маҳрум гашт.

Аз байни паҳлавонони тоҷик Комроншоҳи Устопириён 28-уми июл ва Темур Раҳимов 30-юми июл вориди рақобат мешаванд.

Комроншоҳи Устопириён дар вазни то 90 кило ба рақобат аз даври дувум мепардозад. Рақибаш Аксел Клергет аз Фаронса аст, ки дар феҳристи ҷаҳонӣ нисбат ба Комроншоҳ панҷ зина болост (ҷойи 17-ум). Дар ин вазн 33 гуштигир барои ҷоизаҳо талош мекунанд.

Темур Раҳимов дар вазни беш аз 100 кило дар даври аввал бо Энди Гранда аз Куба қувваозмоӣ хоҳад кард. Энди дар феҳристи ҷаҳонӣ нисбат ба Темур се зина поён аст (20-ум). Дар ин вазн 22 нафар сабти ном шудаанд.

Ёдовар мешавем, Баҳодур Усмонов, муштзани маъруфи тоҷик, ки 25-уми июл дар Олимпиадаи Токио дар даври муқаддамотӣ дар вазни то 63 кило бар Леонел Сантоз Нунез аз Доминикан бо ҳисоби 4:1 пирӯз шуд, дар даври баъдӣ бо Элнур Абдураимов, варзишгари қазоқтабори узбекистонӣ, рақобат хоҳад кард.

Ба иттилои сомонаи olympics.com қувваозмоӣ миёни Баҳодур Усмонови 23-сола (либоси сурх) ва Элнур Абдураимови 27-сола (либоси кабуд) рӯзи 31-уми июл соати 12:51 бо вақти маҳаллӣ (8:51 бо вақти Душанбе) шуруъ мешавад.

Элнур Абдураимов барандаи медали биринҷии қаҳрамонии ҷаҳон дар соли 2015 дар Доҳаи Қатар мебошад. Ӯ соли 2017 дар қаҳрамонии ҷаҳон дар Ҳамбурги Олмон мақоми панҷумро касб кардааст. Элнур соли 2017 дар қаҳрамонии Осиё дар Тошканд бо медали тилло сарфароз шудааст. Имсол бошад, дар қаҳрамонии Осиё дар Дубайи Имороти Муттаҳидаи Араб соҳиби медали биринҷӣ гардид.

Баҳодур Усмонов бошад, соли 2019 дар Бангкоки Тайланд ба унвони қаҳрамони Осиё даст ёфтааст. Ӯ имсол дар қаҳрамонии Осиё дар Дубай медали биринҷӣ гирифт. Баҳодур дар қаҳрамонии ҷаҳон соли 2019 дар Екатеринбурги Русия мақоми нӯҳумро касб кардааст.

Қаблан муштзани дигари тоҷик Шаббос Неъматуллоев дар вазни то 81 кило аз Даксианг Чен аз Чин бо ҳисоби 0:4 шикаст хӯрд ва аз ҳаққи ширкат дар даври баъдӣ маҳрум гашт.

Боз як муштзани тоҷик Сиёвуш Зуҳуров рӯзи 29-уми июл дар вазни беш аз 91 кило қувваозмоӣ мекунад. Рақибаш Мурод Алиев аз Фаронса мебошад.

Дар намуди дигар - шиноварӣ ба масофаи 50 метр бо тарзи озод Анастасия Тюрина ва Олимҷон Ишонов 30-юми июл ба рақобат мепардозанд. Илдар Аҳмадиев оид ба варзиши сабук дар давидан ба масофаи 100 метр миёни мардон рӯзи 31-уми июл рақобат хоҳад кард.

Дар Бозиҳои ХХХII тобистонаи олимпӣ Тоҷикистонро даҳ варзишгар намояндагӣ мекунад. Се нафари онҳо – паҳлавон Комроншоҳи Устопириён, шиноварон Анастасия Тюрина ва Олимҷон Ишонов бори дуюм аст, ки ба ҳаққи ширкат дар Бозиҳои олимпӣ мушарраф шудаанд. Ҳарсе дар Олимпиадаи Рио-2016 иштирок карда буданд. Ҳафт нафари дигар бори аввал дар Бозиҳои олимпӣ ширкат меварзанд.

Дар асоси низомномаи Ҷоизаи президенти Тоҷикистон ба ғолибон ва ҷоизадорони мусобиқаҳои байналмилалии варзишӣ ба варзишгароне, ки дар Бозиҳои олимпӣ ҷойҳои аввал, дувум ва севумро сазовор мешаванд, мутаносибан 300 000 сомонӣ, 250 000 сомонӣ ва 200 000 сомонӣ супурда мешавад.

Инчунин шаҳрдори Душанбе Рустами Эмомалӣ ба варзишгароне, ки дар Олимпиадаи Токио медал ба даст меоранд, дар пойтахти кишвар хона туҳфа мекунад. Аз ҷумла, барои медали тилло хонаи чорҳуҷрагӣ, барои медали нуқра хонаи сеҳуҷрагӣ ва барои медали биринҷӣ хонаи дуҳуҷрагӣ тақдим мегардад.

Бозиҳои тобистонаи олимпӣ дар Токио, ки 23-юми июл шуруъ шуд, то 8-уми август идома хоҳад кард. Олимпиада мебоист соли гузашта баргузор мешуд, аммо ба иллати пандемияи коронавирус барои як сол мавқуф гузошта шуд.

Вазорати корҳои дохилии Тоҷикистон ҷузъиёти тасодуфи маргбор дар роҳи Хуҷанд-Мастчоҳро эълон кард, ки дар натиҷаи он 7 нафар ҷон доданд. Ҳодиса 28-уми июн рух дода, дар бораи он аввал Радиои Озодӣ хабар дода буд.

Дар баёнияи расмии ВКД аз рӯзи 30-уми июн омадааст, дар пайи ин сонеҳа 7 нафар ба ҳалокат расида, 3 каси дигар захмӣ шудааст. Ду нафар аз қурбониён шаҳрвандони Узбекистон ва панҷ каси дигар аъзоёни як оила, аз шаҳри Истиқлоли Тоҷикистон ҳастанд. Яке аз ҳалокшудагон 8 ва дигарӣ 15-сола будааст.

Ба қавли вазорат, сабаби садама, ба ақиби мошини дигаре бархӯрдану аз роҳаш хориҷ шудани мошини Муҳаммадӣ Холбоев, шаҳрванди Узбекистон будааст. Дар ин ҳодиса, ки дар қаламрави ноҳияи Мастчоҳ рух дод, ду ноболиғи дигар яке 8 ва дигарӣ 15-сола захм бардошта, бемори бистарӣ шудаанд.

Ин фалокат дуввумин садамаи мудҳиши маргбор дар вилояти Суғд дар тӯли камтар аз як моҳ аст. Рӯзи 29-уми май дар як садамаи шабеҳи дигар дар ноҳияи Ҷаббор Расулов шаш нафар ҷон бохтанд. Дар Тоҷикистон солона садҳо нафар дар чунин садамаҳо ҷон медиҳанд ва садҳо каси дигар маъюби якумрӣ мешаванд. Беътиноӣ ба қоидаҳои ҳаракат, роҳҳои нимавайрон, суръати баланд аз сабабҳои асосии маргумир дар роҳҳои кишвар дониста мешавад.

ИНЧУНИН, БИХОНЕД:

Тафсилоти садамаи мудҳиш дар Суғд. Ду узбекистонӣ ҳам ҷон бохтаанд

Хабаргузории давлатии ТАСС-и Русия мегӯяд, фақат яке аз гумонбарони асосӣ ба ҳамлаи террористӣ дар Крокус "тамоми гуноҳҳояшро эътироф" ва аз амалкардҳояш изҳори пушаймонӣ кардааст. Хабаргузорӣ чанд рӯз аст, ки ҷузъиёти парвандаи ҳамлаи пурқурбонӣ ба ин толори консертӣ дар канори Маскавро нашр мекунад, вале ҳеч чизе аз гуфтаи вакилони дифои муҳоҷирони тоҷик наовардааст.

ТАСС рӯзи 30-уми июн навишт, ки бо эътирофоти Фаридуни Шамсиддин аз парвандаи ӯ ошно шудааст. "Ба гуноҳаш комилан эътироф кард. Аз кардааш пушаймон аст,"-навиштааст ТАСС.

Фаридуни Шамсиддинро бо амри додгоҳи Маскав шаби 24-уми март бо иттиҳоми "анҷоми амалиёти террористӣ" боздошт карданд ва гуфтанд, ки ӯ чанд рӯз қабл аз ҳодиса аз Туркия ба Маскав омадааст. Назари вакили дифои Фаридуни Шамсиддин дар ин хабар оварда нашудааст. Аммо шеваи боздошту латӯкуби бераҳмонаи чор муҳоҷири тоҷик баъди ҳамла, сабаби хашми мардум шуд ва ин шубҳаву гумонро барангехт, ки шаҳрвандони Тоҷикистон зери шиканҷа гуноҳи нокардаро ба гардан гирифтаанд.

Ба навиштаи хабаргузории ТАСС, се гумонбари дигар ба ҷиноят Муҳаммадсобир Файзов, Саидакрам Раҷабализода ва Далерҷон Мирзоев, агарчӣ ба гуноҳи хеш иқрор шудаанд, вале аз кардаашон изҳори пушаймонӣ накардаанд.

Маъмурони амниятии Русия вақти боздошт гӯши яке аз муттаҳамонро бурида ва дигариро ба ҳадде зада буданд, ки дар аробаи маъюбон ва беҳушу беёд ӯро ба додгоҳ оварда буданд. Дигариро порчае аз селофан дар гардан оварда буданд, ки умдатан барои нафасгир кардан истифода мебаранд.

Дар ҳамлаи террористӣ ба толори консертии Крокус дар канори Маскав дар рӯзи 22-уми марти соли гузашта 149 нафар нафар кушта ва 609 каси дигар маҷруҳ шуданд. Дар умум мақомоти Русия 19 нафарро ба анҷоми ин ҳамла муттаҳам мекунанд ва аксари онҳо шаҳрвандони Тоҷикистон ҳастанд.

Гуруҳи ба ном "Давлати исломӣ" дар он замон масъулияти ин ҳамларо бар уҳда гирифт, аммо ҳафтае пештар хабаргузории ТАСС навишт, ки ин ҳамларо бо амри Хадамоти махсуси Украина анҷом додаанд. Иддаое, ки ин кишвар рад кардааст.

Ҳамлаи террористӣ ба "Крокус" ҷомеаи Тоҷикистонро ваҳшатзада кард ва баъди он мақомоти Русия ба амалиёти густурда ва олуда бо бадрафториро ба зидди муҳоҷирони тоҷик оғоз карданд.

Эрон имкониятҳои техникӣ барои азсаргирии ғанисозии уранро ҳифз кардааст. Дар ин бора Рафаэл Гросси, мудири Оҷонси Байнулмилалии Энержии Атомӣ (МАГАТЭ) дар суҳбат бо телевизиони CBS хабар додааст.

Гросси гуфтааст, ҳамлаҳои Исроил ва ИМА ба ниҳодҳои ҳастаии Эрон зарари ҷиддӣ расонд, вале онҳоро нобуд накардааст.

"Онҳо давоми чанд моҳ метавонанд ғанисозии уранро оғоз кунанд, ҳатто барвақтар. Намешавад тасдиқ кард, ки ҳама чиз нобуд шудааст ва чизе боқӣ намонд,"-гуфтааст Гросси.

Доналд Трамп, раиси ҷумҳури Амрико баъди ҳамлаи артиши ин кишвар ба се таъсисоти ҳастаии Эрон гуфт, ниҳодҳои ҳастаии Эрон комилан нобуд шуданд. Вале бархе расонаҳо, азҷумла CNN, The New York Times бо такя ба манобеи худ навиштанд, ҳамлаҳои Амрико барномаи ҳастаии Эронро танҳо муваққатан манъ кард.

Ба гузориши нашрияи Financial Times, бахши асосии урани ғанишуда ҳамчунон боқӣ мондааст.

Ҳавопаймоҳои Амрико шаби 21-уми июн ба се иншооти ҳастаии Эрон - Форду, Натанз ва Исфаҳон бомбҳои азиме андохтанд.

Президенти Амрико Доналд Трамп аз лоиҳаи қонун дар бораи ҷорӣ кардани таҳримҳои нав алайҳи Русия, ҷонибдорӣ кардааст. Дар ин бора сенатори ҷумҳурихоҳ Линдси Грэм дар суҳбат бо телевизиони ABC хабар додааст.

"Дирӯз бори аввал президент ба ман гуфт, вақти он расидааст, ки ин лоиҳаро пеш барем,"-гуфт Грэм ва илова кард, ки сенаторҳо ба президент Трамп роҳкоре медиҳанд, ки Владимир Путинро барои музокира бо Украина маҷбур кунад.

Ба гуфтаи Линдси Грэм, таҳримҳои нав пешбинӣ мекунанд, ки кишварҳо дар сурати аз Русия молу маҳслуот харидан, бояд ба Украина кумак кунанд. Агар давлатҳо ин корро накунанд, ба маҳсулоти содиротии онҳо ба ИМА 500 дарсад боҷи гумрукӣ баста мешавад.

Ба гуфтаи Грэм, аз 100 сенатор 84 нафар аз лоиҳаи қонун пуштибонӣ кардаанд.

Манобеи Wall Street Journal навиштаанд, Кохи Сафед талош мекунад Линдси Грэмро водор кунад, ки лоиҳаи қонуни таҳримҳо алайҳи Русияро сабуктар кунад.

Аз замони оғози ҳамлаи бедалели Русия ба Укрина дар моҳи феврали соли 2022, Иттиҳоди Аврупо ва Амрико алайҳи Маскав таҳримҳои сангине ҷорӣ карданд.

Бо гузашти камтар аз як ҳафтаи оташбас миёни Исроил ва Эрон, баъзе расонаҳои Исроил иддао карданд, ки артиш ва ҳукумати ин кишвар ба ҷанги нав зидди Эрон омода мешаванд.

Сомонаи иқтисодии исроилӣ Calcalist 29-уми июн навишт, ки ба ниҳодҳои дифои Исроил равшан аст, ки бояд ба даври дигари ҷанг бо Эрон омода бошанд.

Ба гузориши Радио Фардо, бахши форсии Радиои Озодӣ, раҳбарони сиёсӣ ва фармондеҳони аршади низомии Эрон низ гуфтанд, ки ба оташбас бо Исроил итминон надоранд. Муҳаммадризо Нақдӣ, муовини ҳамоҳангсози Сипоҳи посдорони инқилоб, 28-уми июн дар мусоҳиба бо шабакаи хабарии Эрон гуфт, " дастони мо барои зарба задан ба душман "пур" аст.

Эрон ва Исроил рӯзи 24-уми июн ва пас як ҷанги 12 рӯза оташбас карданд. Ҳарду тараф борҳо ҳамдигарро ба вайрон кардани он муттаҳам кардаанд.

Рӯзи 13-уми июн Исроил ба Эрон ҳамлаҳои ғофилгиронае анҷом дод ва таъсисоти атомиву донишмандони ҳастаии кишвар ва фармондеҳони низомиашро ҳадаф гирифт. Рӯзи 22-уми июн Амрико ҳам ба ин ҳамлаҳо пайваст ва ба се таъсисоти муҳими атомии Эрон бомбаҳои азиме андохт. Дар посух Эрон ба ду пойгоҳи Амрико дар Қатар ва Ироқ мушак партофт, ҳарчанд мақомоти Қатар гуфтанд, ин ҳамлаҳо хисороте дар пай надоштанд.

Додгоҳи шаҳри Хуҷанд як нафарро барои кӯшиши ворид кардани маблағ ба дохили маҳбас ҷазо додааст.

Ба иттилои Додгоҳи Хуҷанд, моҳи апрели имсол У.М. мехост барои дидорбинии кутоҳ ба назди ҷиянаш ба маҳбаси 3/5-и шаҳри Хуҷанд дарояд. Манбаъ мегӯяд, дар вақти ворид шудан ба зиндон, аз ҷайби ин нафар 460 сомонӣ ёфтанд.

Моддаи 472-и Кодекси ҳуқуқвайронкунии маъмурӣ, "ғайриқонунӣ ворид кардани ашёи манъшуда"-ро ба зиндон ва боздоштгоҳҳо манъ кардааст. Дар ин банди қонун номгӯи "ашёи манъшуда" мушаххасан зикр нашудааст.

Дар гузориши Додгоҳи Хуҷанд аз рӯзи 23-юми июн омадааст, парвандаи маъмурӣ нисбати У.М. дар ғайби ӯ баррасӣ гардид, чун ин нафар ба додгоҳ ҳозир нашуд. Назари шахси маҳкумшуда ба иттиҳом маълум нест.

Дар Додгоҳи Хуҷанд гуфтанд, У.М. 750 сомонӣ ҷарима шуда, инчунин 460 сомониаш ҳам мусодира шудааст. Маълум нест, ин шахс аз болои ҳукм шикоят бурдааст ё не.

Ин яке аз камтарин ҳолатҳоест, ки додгоҳҳои Тоҷикистон як нафарро барои кӯшиши ворид кардани маблағ ба зиндон ҷазо медиҳанд.

Радиои Озодӣ баъзе тафсилоти тасодуфи маргбор дар роҳи Хуҷанд-Мастчоҳро ба даст овард. Пеш аз зуҳри 28-уми июн се мошин дар наздикии деҳаи Хамрободи ноҳияи Бобоҷон Ғафуров бо ҳам бархӯрданд. Ронандаи яке аз мошинҳо сокини Мастчоҳ, дигарӣ аз Хуҷанд ва севумӣ шаҳрванди Узбекистон будаанд.

Ба гуфтаи як манбаи огоҳ, дар пайи ин сонеҳа 7 нафар ба ҳалокат расид, ки ду нафарашон ноболиғ ҳастанд. Ин наврасон шаҳрвандони Узбекистон будаанд.

"Дар ин ҳодиса се нафар захмӣ шудааст, ки як нафарашон шаҳрванди Узбекистон ва ду тани дигари сокинони ноҳияи Мастчоҳ мебошанд. Таҳқиқи ҳодиса идома дорад,"-афзуд манбаи Радиои Озодӣ.

Мақомоти давлатӣ, аз ҷумла Вазорати корҳои дохилии Тоҷикистон расман ҳодисаро шарҳ надодаанд.

Дар як моҳи охир ин бори дувум аст, ки дар вилояти Суғд тасодуфҳои маргбор рух медиҳанд. Рузи 29-уми май дар воқеаи замсон дар ҳудуди ҷамоати Гулхонаи ноҳияи Ҷаббор Расулов шаш нафар ҷон бохтанд.

Дар Тоҷикистон солона садҳо нафар дар тасодуфҳои нақлиётӣ ҷон медиҳанду ва садҳо нафари дигар маъюби якумрӣ мешаванд. Бепарвоӣ, роҳҳои нимавайрон ва риоят накардани қоидаҳои ҳаракат дар роҳ ва суръати баланд аз сабабҳои асосии маргумир дар роҳҳои кишвар дониста мешавад.

Вазорати корҳои хориҷии Озарбойҷон ба амалкарди неруҳои Русия нисбати муҳоҷирони озарӣ дар Екатеринбург норозигӣ кардааст.

Дар хабарномаи расмӣ омадааст, 27-уми июн дар ҷараёни рейди пулиси Русия "ду озарбойҷонӣ ба таври ваҳшиёна кушта шуда, чанд нафари дигар ҷароҳатҳои вазнин бардоштаанд. Нуҳ нафар ҳам боздошт шуд."

Намояндагони Вазорати корҳои хориҷии Озарбойҷон гуфтанд, Петр Волков, кордори муваққати Сафорати Русияро даъват карда, норозигии Бокуро ба ӯ расондаанд.

"Изҳори умедворӣ кардем, ки ин қазия таҳқиқ мешавад ва онҳое, ки дар ин хушунат даст доштанд, ҳарчӣ зудтар ба ҷавобгарии ҷиноӣ кашида мешаванд," - омадааст дар хабари матбуоти Вазорати корҳои хориҷӣ.

Мария Захарова, сухангӯи Вазорати корҳои хориҷии Русия гуфт, амалиёт ва боздошти чанд нафар дар Екатеринбург дар доираи парвандаи ҷиноӣ анҷом шуд. Захарова афзуд, гумонбарон шаҳрвандони Русия ҳастанд.

Мақомоти Русия мегӯянд, аз тариқи намояндаашон дар Боку ба Вазорати корҳои хориҷии Озарбойҷон расондаанд, ки вазъият зери назорати мақомоти тафтишотӣ қарор дорад.

Нашрияи E1 гузориш додааст, ки рӯзи ҷумъаи 27-уми июн қариб 50 озарбойҷонӣ дар Екатеринбург боздошт шуданд. Ба гузориши ин манбаъ, як нафари онҳо ҳангоми боздошт ҳалок шудааст. Сабаби боздошти ӯ бемории қалб гуфта мешавад. Мақомоти Озарбойҷон аз "ваҳшиёна кушта шудан"-и ду озарӣ нигаронӣ карданд.

Тасмими Эрон дар бораи қатъи ҳамкорӣ бо Оҷонси Байнулмилалии Энержии Атомӣ (МАГАТЭ) ва манъи вуруди Рафаэл Гроссӣ, раиси Оҷонс вокуниши Амрикоро ба миён овард.

Ноиби раиси Маҷлиси Шӯрои Исломӣ ё порлумони Эрон рӯзи 28-уми июн гуфт, ба Рафаэл Гроссӣ дигар иҷозаи вуруд ба ин кишварро намедиҳанд.

Ба гузориши хабаргузории "Тасним", Ҳамидризо Ҳоҷибобоӣ дар Ҳамадон гуфтааст, "иҷоза намедиҳем, ки Гроссӣ вориди хоки кишвар шавад."

Пеш аз ин порлумони Эрон ҳама гуна ҳамкории Теҳрон бо Оҷонси Байнулмилалии Энержии Атомӣ (МАГАТЭ) ва вуруди нозирони ин созмонро ба Эрон манъ карда буд. Бархе намояндагони порлумони Эрон ва ҳам рӯзномаи "Кайҳон" хостори "боздошт ё эъдом (қатл)"-и Рафаэл Гроссӣ шуданд.

Вазири корҳои хориҷии Амрико ин изҳороти матраҳшударо ғайриқобили қабул хонд ва хостори маҳкумияти ин суханҳо шуд.

Марко Рубио дар шабакаи иҷтимоии X (Твиттер) навишт, ИМА аз назорати Оҷонси Байнулмилалии Энержии Атомӣ дар Эрон ҳимоят мекунад. Рубио аз Теҳрон хост, ки амнияти нозирони Оҷонсро таъмин кунад.

Артиши Исроил хабар дод, ки яке аз фармондеҳони баландпояи гуруҳи "Ҳамос"-ро дар Навори Ғазза куштааст. Ба гузориши артиши Исроил, Ҳакам ал-Исо яке аз фармондеҳони асосӣ дар шохаи низомии "Ҳамос" буд ва дар ҳамлаи 7-уми октябри соли 2023 ба Исроил ширкат дошт.

Гуруҳи "Ҳамос", ки дар Амрико ва Иттиҳоди Аврупо созмони террористӣ шинохта шудааст, дар бораи кушта шудани ин фармондеҳаш чизе нагуфтааст.

Дар хабарномаи артиши Исроил омадааст, ал-Исо дар ҳамла ба сокинони мулкӣ ва низомиёни Исроил дар Ғазза даст дошт.

Ҷанг дар Ғазза 7 октябри соли 2023 бо ҳамлаи созмони фаластинии "Ҳамос" ва гурӯҳҳои ҳампаймони он ба Исроил, оғоз шуд. Дар ин ҳамла 1200 нафар кушта ва беш аз 250 нафар ба гарав гирифта шуд. Амрико ва Аврупо "Ҳамос"-ро созмони террористӣ медонанд. Тибқи охирин маълумот, феълан 50 гаравгон дар дасти "Ҳамос" ҳастанд ва 20 нафарашон зиндаанд.

Ба гуфтаи вазорати тандурустии Ғазза, ки зери назорати "Ҳамос" аст, дар ҳамлаҳои Исроил то кунун дар Ғазза беш аз 56 ҳазор нафар кушта шудаанд. Аксари ин кушташудаҳо занон ва кӯдакон мебошанд. Беш аз 2 миллион аҳолии ин минтақа беҷо шудаанд ва мардум аз қаҳтӣ ва гуруснагӣ ранҷ мебаранд.

Бар асари як сонеҳаи нақлиётӣ дар роҳи Хуҷанд-Мастчоҳ, дастикам 7 нафар ба ҳалокат расидаанд Бархе манбаъҳо шумораи ҷонбохтагонро бештар мегӯянд.

Тибқи иттилои дарёфтии Радиои Озодӣ, садама пеш аз зуҳри 28 июн рух дода, се мошин ба ҳам бархӯрдаанд.

Дар натиҷа, ба гуфтаи шоҳидон, бисёре аз мусофирон фавтидаанд. Бархе манбаъҳои шумораи ҷонбохтагонро 7 нафар ва бархе ҳам аз ин бештар мегӯянд. Чанд нафар ҳам захмӣ шудаанд.

Гуфта мешавад, ки ронандаи яке аз мошинҳо сокини Мастчоҳ, дигарӣ аз Хуҷанд ва севумӣ шаҳрванди Узбекистон будаанд.

Дар аксҳо ва наворҳои видеоие, ки ба дасти Радиои Озодӣ расид, дида мешавад, ки мошинҳои ба ҳам бархӯрда, осеби ҷиддӣ дидаанд ва мардуми зиёде дар маҳал ҳузур доранд.

То кунун дар мавриди ҳодиса ва сабабҳои сар задани он маълумоти зиёде дар даст нест. То лаҳзаи нашри ин хабар Вазорати корҳои дохилӣ дар бораи он шарҳи расмӣ паҳн накардааст. На намояндагони ҳукумати Масчоҳ ва на дигар кормандони сохторҳои ҳифзи ҳуқуқ ба зангҳо ҷавоб намедиҳанд.

Бо ба даст омадани маълумоти бештар дар бораи ин ҳодиса Радиои Озодӣ онро нашр хоҳад кард.

Давоми як моҳи ахир ин бори дувум аст, ки дар вилояти Суғд садамаҳои маргбор рух медиҳад. Рузи 29 май бар асари чунин ҳодиса дар ҳудуди ҷамоати Гулхонаи ноҳияи Ҷаббор Расулов, шаш нафар ҷон бохтанд.

Дар Тоҷикистон солона садҳо нафар дар садамаҳои нақлиётӣ ҷон медиҳанду ва садҳо нафари дигар маъюби якумрӣ мешаванд. Бепарвоӣ, роҳҳои нимавайрон ва риоят накардани қоидаҳои ҳаракат дар роҳ ва суръати баланд аз сабабҳои асосии маргу мир дар роҳҳои кишвар дониста мешавад.

Бар асари селобҳои шадид дар минтақаҳои шимол-ғарби Покистон, дастикам 11 нафар ба ҳалокат расидаанд.

Идораи ҳолатҳои фавқулода дар иёлати Хайбар-Пахтунхоҳ гуфтааст, ки дар 24 соати гузашта 11 тан, аз ҷумла занон ва кӯдакон ҷон дода ва 6 тани дигар захмӣ шудаанд.

Ба иттилои ин ниҳод, 10 тан аз ин қурбониён дар дараи Свот ҷон бохтаанд.

Ҳамчунин аз вайрон шудани беш аз 50 хона дар натиҷаи селоб дар иёлати Хайбар-Пахтунхоҳ гузориш шудааст.

Идораи ҳавошиносии Покистон аз боронгариҳои шадид ва эҳтимоли сарозер шудани селоб дар чаҳор рузи оянда, ҳушдор додааст.

Покистон яке аз осебпазиртарин кишварҳои ҷаҳон аз тағйироти иқлимӣ аст. Миллионҳо нафар дар ин кишвар дар рӯбарӯи хатари офатҳои табиӣ қарор доранд.

Доналд Трамп, раисҷумҳури Амрико мегӯяд, ки эҳтимол дорад ҳафтаи оянда дар навори Ғазза оташбас барқарор шавад.

Президенти Амрико рузи 27 июн дар маросиме дар Кохи Сафед дар посух ба пурсиши хабарнигорон дар бораи вазъияти Ғазза гуфт, "ман қаблан бо тарафҳои даргир суҳбат кардаам. Вазъияти ваҳшатноке ҷараён дорад. Дар мавриди Ғазза суҳбат мекунем. Мо фикр мекунем, ки ҳафтаи оянда ба оташбас мерасем".

Вазорати тандурустӣ дар Ғазза, ки зери назорати гурӯҳи "Ҳамос" аст, мегӯянд, ки аз оғози ҷанг то кунун беш аз 56 ҳазор нафар кушта ва беш аз 130 ҳазор тани дигар захмӣ шудаанд.

Тибқи гузоришҳо, ахиран бар ғайринизомиёни фаластинӣ, ки барои дарёфти кӯмак дар саф истода буданд, чандин бор ҳамла шудааст. Мақомҳои тандурустӣ рӯзи ҷумъа гуфтанд, ки танҳо дар 24 соати гузашта, 72 тан кушта ва 174 нафари дигар захмӣ шудаанд.

Хабаргузории "Рейтерз" низ аз қавли шоҳидони айнӣ гузориш додааст, ки дар минтақаи Рафаҳ, нерӯҳои исроилӣ бар ҳазорон ғайринизомӣ, ки мунтазири дарёфти ғизо буданд, тирандозӣ карданд.

Артиши Исроил то кунун дар ин бора вокуниш нишон надодааст.

Аз суи дигар, гурӯҳи "Ҳамос" аз Созмони Милали Муттаҳид хост, то як кумитаи байналмилалӣ барои баррасии ин тирандозӣ ташкил кунад.

Ҷанг дар Ғазза рӯзи 7 октябри соли 2023 оғоз шуд. Дар ин рӯз гурӯҳи "Ҳамос" ва созмонҳои ҳампаймони он ба Исроил ҳамла карда, 1200 нафарро куштанд ва беш аз 250 танро ба гарав гирифтанд. Амрико ва Аврупо "Ҳамос"-ро гурӯҳи террористӣ мехонанд.

Дар ҳамлаҳои Исроил ба Ғазза дар як солу нуҳ моҳи гузашта беш аз 56 ҳазор нафар кушта шуданд, ки аксари онҳо занон ва кудакон мебошанд.

Талошҳо барои оташбаси доимӣ ва барқарории сулҳ дар Ғазза то кунун бенатиҷа будааст.

Расонаҳои Лубнон рӯзи 27 июн аз ҳамлаи Исроил ба теппаҳои атрофи шаҳри Набтия дар 52-километрии ҷануби Бейрут, хабар доданд.

Ба гуфтаи артиши Исроил, ҳадафи ин амалиёт қароргоҳ ва анбори силоҳҳое буд, ки "Ҳизбуллоҳ" ният дошт онро бозсозӣ кунад. Сухангӯи артиши Исроил гуфтааст, ки дар ин ҳамла "ҳеҷ сохтмони оддӣ ҳадаф набудааст".

Вазорати тандурустии Лубнон эълон кард, ки дар ин ҳамлаи артиши Исроил як зан кушта ва 11 нафари дигар захмӣ шудаанд. Ба гуфтаи ин манбаъ, "дар ҳамлаи паҳбодии Исроил як бино дар Набтия ҳадаф қарор ва як зан кушта шуд".

Расонаҳои маҳаллӣ эълон карданд, ки сокинони шаҳри Набтия дар миёни садои таркишҳо, талош карданд, ки ба паноҳгоҳҳо бираванд.

Раисҷумҳур ва нахуствазири Лубнон ҳамлаҳои рӯзи 27 июнро маҳкум карданд ва онро нақзи оташбас байни ду кишвар хонданд.

Рӯзи 15-уми январи имсол Исроил ва "Ҳизбуллоҳ" пас аз беш аз як сол ҳамлаҳои ба якдигар, бар сари оташбас тавофуқ карданд.

Масъуд Пизишкиён, раиси ҷумҳури Эрон хостори таҳқиқи ин масъала шудааст, ки оё дар воқеъ Исроил барои ҳамла ба кишвараш аз қаламрави ҳавоии Озарбойҷон истифода кардааст, ё не.

Пизишкиён дар гуфтугӯи телефонӣ бо Илҳом Алиев, раиси ҷумҳури Озарбойҷон дар рӯзи 26-уми июн аз ӯ хостааст, гузоришҳо дар бораи онро, ки паҳподҳои исроилӣ, аз ҷумла паҳподҳои хурди он ба воситаи ҳарими ҳавоии Озарбойҷон ба Эрон ворид шудаанд, “таҳқиқ ва мушаххас” кунад.

Бар асоси иттилои расмии мақомоти Эрон, Илҳом Алиев зимни гуфтугӯ ин иддаоро рад ва таъкид кардааст, ки Озарбойҷон иҷоза намедиҳад, аз қаламрави он ба зидди Эрон истифода баранд. Дар баёнияи расмии Озарбойҷон ҳеч ишорае ба гуфтаҳо ҷой дода нашудааст.

Дар ҳамин рӯз матбуоти Исроил аз қавли як мақоми номаълуми вазорати дифои ин кишвар навишт, ки артиши Исроил ҳангоми ҷанг дар ҳудуди як кишвари “наздик” ба Эрон амал мекард. Ҷузъиёте аз ин бештар дода нашудааст. Тақвияти робитаҳои Озарбойҷону Исроил аз дер боз мояи нороҳатии Эрон аст.

Ҳамкории ду тараф, бахусус дар арсаи низомӣ солҳои ахир рушд кард. Озарбойҷон ҳам соли 2023 дар Тел Авив сафорат боз кард, ки мақомоти эронӣ ба он бо шубҳа менигаранд. Бино ба гузориши Пажӯҳишгоҳи Байналмилалии Сулҳи Стокҳолм 69 дар сад аз аслиҳа ва муҳимоти ҷангии маъмулӣ, ки Озарбойҷон харидааст, сохти Исроил аст.